Nee, yndie gjin snert hjir yn Malawi, mar wol snertwaar. Net te sunich sa gie it ôfrûne nacht tekear. It tongere sa dat it hiele hutsje derfan trille en ik úteinlik begriep wêrom der in amer mei wetter yn elts ferbliuw klearstiet. Net dat ik benaud wie, nee it lei eins wol lekker, mar de klappen holden my wol út de sliep. It wie dus ek hielendal net let doe't ik fan ‘e moarn wer yn de fearren wie om de auto te pakken en nei Lilongwe te riden.

Omdat ik juster dus grut ynslein hie, wat mango's oanbelanget, hie ik fan ‘e moarn in fruithapje. Ik hie der earst net it measte ferdusje yn, want se liken wat grien en hurd, mar it die bliken dat de mango's hearlik swiet en ryp wienen. Frank en Ab hienen se mar goed útsocht.