Mua, moandei 4 desimber 2006

Earst noch efkes koart oer justerjûn. Ik koe moai allegear e-mails ferstjoere nei freonen, omdat ik dus sa snel ynternet hie. De ferhaaltsjes wienen samar op de side setten en ik koe min of mear in bytsje surve (Studintmail besjen en sa). Dêrnei haw ik efkes op de keamer sitten en in skoft ûnder de dûs stien. Ik haw it de earste dei alwer foar inoar krigen om te ferbrânen op de rêch. Net slim, mar dat komt fansels omdat ik gjinien haw om it flak yn te smarren. Wer in reden werom Wiebren mar gau dizze kant opkomme moat.

Mangochi, snein 3 desimber 2006

Dêr sit ik dan, yn in resort mei fjouwer stjêren en in eigen fleanfjild. Net it soarte fan ferbliuw wat ik yn earste ynstânsje yn gedachten hie doe't ik fan ‘e moarn fan de kampus wei ries, mar in tige moai plakje en de ultime start fan in fakânsje. It is jûn efkes jild telle, mar stikem mei ik dit feestje fan mysels fiere as hast ôfstudearre dokter. Hoe't dit sa allegear kommen is sil ik jim aanst fertelle.